` 14 రోజుల రిమాండ్ విధింపు` మా ఆస్తులు కొట్టేశాడు
` బాధితుల ఆందోళన
` రామకృష్ణను బెదిరించినట్లు రాఘవ అంగీకరించాడు: ఏఎస్పీ రోహిత్
కొత్తగూడెం,జనవరి 8(జనంసాక్షి):పాల్వంచలో ఈ నెల 3న రామకృష్ణ కుటుంబం ఆత్మహత్య చేసుకున్న ఘటనలో అరెస్టు చేసిన వనమా రాఘవను పోలీసులు కొత్తగూడెం మెజిస్ట్రేట్ ముందు హాజరుపరిచారు. అతడికి కోర్టు 14 రోజుల జ్యుడిషియల్ రిమాండ్ విధించింది. అనంతరం పోలీసులు నిందితుడిని భద్రాచలం సబ్జైలుకు తరలించారు.అంతకుముందు వనమా రాఘవ అరెస్టుపై ఏఎస్పీ రోహిత్ రాజ్ విూడియాతో మాట్లాడారు. ‘‘ఈ నెల 3న రామకృష్ణ కుటుంబం ఆత్మహత్య చేసుకుంది. భార్య, ఇద్దరు కుమార్తెలపై పెట్రోల్ పోసి తానూ నిప్పంటించుకున్నారు. ఘటనాస్థలిలో రామకృష్ణ, శ్రీలక్ష్మి, సాహిత్య చనిపోయారు. ఆస్పత్రిలో చికిత్స పొందుతూ పెద్దకుమార్తె సాహితీ మృతిచెందింది. ఈ నెల 3న రామకృష్ణ బావమరిది జనార్దన్ ఫిర్యాదుతో పాల్వంచ పీఎస్లో కేసు నమోదు చేశాం. ఐపీసీ 302, 307, 306 సెక్షన్ల కింద కేసు పెట్టాం.ఆత్మహత్యకు ముందు రామకృష్ణ సెల్ఫీ వీడియో తీసుకున్నారు. సూసైడ్ నోట్, సెల్ఫీ వీడియోలో వనమా రాఘవపై ఆరోపణలు చేశారు. ఆర్థిక ఇబ్బందులే కాకుండా ఇతర కారణాలు ఉన్నాయని వీడియోలో చెప్పారు. రాఘవ, సూర్యవతి, మాధవి కారణంగానే చనిపోతున్నట్లు తెలిపారు. నిందితుల కోసం 8 ప్రత్యేక బృందాలను ఏర్పాటు చేశాం. నిన్న రాత్రి వనమా రాఘవను అదుపులోకి తీసుకున్నాం. దమ్మపేట మండలం మందలపల్లి వద్ద రాఘవను అరెస్టు చేశాం. పలు అంశాలపై రాఘవను విచారించాం.రామకృష్ణను బెదిరించినట్లు రాఘవ అంగీకరించారు. లభ్యమైన ఆధారాలను సీజ్ చేసి కోర్టుకు సమర్పించాం. నిందితులను ఇవాళ కొత్తగూడెం మేజిస్ట్రేట్ ముందు హాజరుపరుస్తాం. రాఘవపై మొత్తం 12కేసులు ఉన్నాయి. గతంలో నమోదైన కేసులపై కూడా విచారణ జరుపుతాం. కేసు దర్యాప్తు దశలో ఉన్నందున పూర్తి వివరాలు వెల్లడిరచలేం. వనమా రాఘవపై ఫిర్యాదుకు ఎవరూ ముందుకు రాలేదు’’ అని ఏఎస్పీ రోహిత్ రాజ్ చెప్పారు. కాగా నిన్న రాత్రి వనమా రాఘవ అతని ప్రధాన అనుచరుడు గిరీశ్, కారు డ్రైవర్ను అదుపులోకి తీసుకున్న పోలీసులు 10గంటల పాటు విచారించారు. రాఘవపై నమోదైన కేసులు, ఆరోపణలపై సుదీర్ఘ విచారణ జరిగింది. అనంతరం కొవిడ్తో పాటు ఇతర వైద్య పరీక్షల నిమిత్తం రాఘవను పాల్వంచ ఆస్పత్రికి తీసుకెళ్లారు. కొవిడ్ పరీక్షల్లో నెగెటివ్ వచ్చినట్లు వైద్యులు చెప్పారు. రాఘవ ఆందోళనకు గురవుతున్నట్లు వైద్యులు వెల్లడిరచారు. బీపీ, షుగర్ సాధారణంగానే ఉన్నట్లు తెలిపారు. పోలీసులు రాఘవను విచారణ చేసుకోవచ్చని వైద్యులు స్పష్టం చేశారు. కాగా తమ ఆస్తులను రాఘవ అన్యాయంగా కొట్టేశాడని పలువురు బాధితులు పేర్కొన్నారు.
